လူတိုင်းတရားထူးရနိုင် / မရနိုင်

အရှင်ဘုရား၊ ခုခေတ်မှာ လူတိုင်း တရားထူးရနိုင်ပါသေးသလား၊ တရားထူး ရနိုင်တယ်ဆိုရင် ဘယ်လိုပုဂ္ဂိုလ်မျိုးတွေသာ ရနိုင်ပါသလဲ၊ မရနိုင်ဘူးဆိုရင်လည်း ဘာဖြစ်လို့ မရနိုင်ရတာလဲဘုရား။ တပည့်တော်ကို ဖြေကြားပေးစေလိုပါတယ်။

မသန္တာ (ဗဟန်း၊ ရန်ကုန်)

              ဒီမေးခွန်းနဲ့ပတ်သတ်ပြီး ကျွတ်ထိုက်တဲ့ပုထုဇဉ်၊ မကျွတ်ထိုက်တဲ့ပုထုဇဉ် လို့ နှစ်မျိုးခွဲခြားပြီး ပဋိသမ္ဘိဒါမဂ် ပါဠိတော်မှာ ဗုဒ္ဓမြတ်စွာ ဟောကြားထားတော်မူခဲ့တာက..

ကျွတ်ထိုက်သော သတ္တ၀ါတို့မည်သည် အဘယ်တို့နည်း၊ ကံ ကိလေသာ ၀ိပါက်ဟူသော တားမြစ်ခြင်းနှင့် မပြည့်စုံကုန်၊ ယုံကြည်မှုရှိကုန်၏။ ကုသိုလ်ဆန္ဒရှိကုန်၏။ ပညာရှိကုန်၏။ ကုသိုလ်တရားတို့၌ သမ္မတ္တနိယာမဟုဆိုအပ်သော အရိယမဂ်သို့ သက်ခြင်းငှါထိုက်ကုန်၏၊ ဤသတ္တ၀ါတို့သည် ကျွတ်ထိုက်သော သတ္တ၀ါတို့တည်း။ (ကျွတ်ထိုက်တဲ့သတ္တ၀ါဆိုတာ တရားထူးရနိုင်တဲ့သူကိုဆိုလိုတာပါ)

(မကျွတ်ထိုက်တဲ့သူကို အပြန်အားဖြင့်သိလေ)

       ဣမေ စ သုဘဒ္ဒ ဘိက္ခူ သမ္မာ ၀ိဟရေယျုံ၊ အသုညော လောကေ အရဟန္တေဟိ အဿာတိ။ (ဒီ၊၂၊၁၂၅)

သုဘဒ္ဒ၊ ရဟန်းမြတ်(၁၂)ယောက် (ကျင့်ဆဲလေးယောက်၊ အရိယာရှစ်ယောက်ကိုဆိုလို) တို့သည် မိမိမျက်မှောက်ပြုအပ်သောတရားကို၊ မိမိကျင့်ဆဲတရားတို့ကို သူတစ်ပါးတို့အား ဟောပြ၍ မိမိတို့အရာ၌ တည်အောင် ပြုကုန်ကြအံ့။ လောက၌ ရဟန္တာတို့မှ မဆိတ်သုဉ်းနိုင်ရာ။

          ယော ဝေါ အာနန္ဒ မယာ ဓမ္မော စ ၀ိနယော စ ဒေသိတော ပညတ္တော၊ သော ဝေါ မမစ္စယေန သတ္ထာ။

အာနန္ဒာ၊ ငါဘုရား ဟောကြား ပညတ်တော်မူအပ်သော သုတ်၊ အဘိဓမ္မာ၊ ၀ိနည်း ဒေသနာတို့သည် ငါဘုရား ပရိနိဗ္ဗာန်ပြုသောအခြားမဲ့၌ သင်တို့ဆရာ (ဘုရား) ပင် ဖြစ်ပေ၏။

          အထက်ပါ ဘုရားရဲ့တရားတော်တွေအရ သာသနာတော်မှာ သုတ်၊ အဘိဓမ္မာ၊ ၀ိနည်းတွေကို ကျင့်ကြံနေသူတွေ ရှိနေသမျှ တရားထူးရနိုင်သေးတယ် ဆိုတာကို သိရပါတယ်။ တရားကျင့်တဲ့ လူတိုင်းအားလုံး တရားရနိုင်သလားဆိုတာကတော့ အောက်ပါအဖြေတွေနဲ့ တိုက်ပြီး ဆုံးဖြတ်ကြည့်ပါ။

ပုဂ္ဂိုလ်ငါးမျိုး

၁။ ပဋိသန္ဓေနေတုန်းက အလောဘ၊ အဒေါသ၊ အမောဟ ဟူသော ယှဉ်ဘက်ဟိတ် ၃-ပါးရှိတဲ့ မဟာဝိပါက် ဥာဏသမ္ပယုတ်စိတ်နဲ့ ပဋိသန္ဓေနေခဲ့သူကို (တိဟိတ်ပုဂ္ဂိုလ်) လို့ခေါ်တယ်။

၂။ ပဋိသန္ဓေနေတုန်းက အလောဘ၊ အဒေါသ၊ ဟူသော ယှဉ်ဘက်ဟိတ် ၂-ပါးရှိတဲ့ မဟာဝိပါက် ဥာဏ၀ိပ္ပယုတ်စိတ်နဲ့ ပဋိသန္ဓေနေခဲ့သူကို (ဒွိဟိတ်ပုဂ္ဂိုလ်) လို့ခေါ်တယ်။

၃။ ပဋိသန္ဓေနေတုန်းက ယှဉ်ဘက်ဟိတ်မရှိတဲ့ အဟိတ်ဝိပါက်စိတ်နဲ့ ပဋိသန္ဓေနေခဲ့သူကို (အဟိတ်ပုဂ္ဂိုလ်) လို့ခေါ်တယ်။

၎။ ထို အဟိတ် ထဲမှာတင် အပါယ်ဒုဂ္ဂတိလေးဘုံမှာ အဟိတ်ကုသလ၀ိပါက် ဥပေက္ခာသန္တီရဏစိတ်နဲ့ ပဋိသန္ဓေနေသူကို (ဒုဂ္ဂတိ အဟိတ်ပုဂ္ဂိုလ်) လို့ခေါ်တယ်။

၅။ ကာမသုဂတိဘုံမှာ အဟိတ်ကုသလ၀ိပါက် ဥပေက္ခာသန္တီရဏစိတ်နဲ့ ပဋိသန္ဓေနေသူကို (သုဂတိ အဟိတ်ပုဂ္ဂိုလ်) လို့ခေါ်တယ်။

     ဒီ ပုဂ္ဂိုလ် ငါးမျိုးကိုကြည့်ခြင်းအားဖြင့် တရားထူးရနိုင်၊ မရနိုင်ဆိုတာ ပဋိသန္ဓေနေစဉ် အတိတ်ကံနဲ့လည်း ဆိုင်တယ်ဆိုတာ သိထားသင့်ပါတယ်။

ဒီပုဂ္ဂိုလ်ငါးမျိုးထဲမှာ တိဟိတ်ပုဂ္ဂိုလ်က လွဲလို့ ကျန် ဒွိဟိတ်.အဟိတ် ပုဂ္ဂိုလ်တွေဟာ ညံ့ဖျင်းတဲ့ပဋိသန္ဓေ၀ိပါက် က တားမြစ်ထားလို့ ဒီဘ၀မှာတော့ ဈာန်မဂ်ဖိုလ်ချမ်းသာကို မရနိုင်တော့ပါဘူး။ ပါရမီအဖြစ် ကြိုးစားပြီး အားထုတ်ထားမယ်ဆိုရင် ဒွိဟိတ်ပုဂ္ဂိုလ်အတွက် ဒုတိဘ၀မှာ ရနိုင်ပါတယ်။

အန္တရာယ်ငါးပါး

   တိဟိတ်ပင်ဖြစ်နေစေကာမူ အခုပြောမယ့် အန္တရာယ်ငါးပါးထဲက တစ်ပါးပါးကို ကျူးလွန်ထားမယ်ဆိုရင် လည်း ဒီဘ၀မှာ ဈာန် မဂ် ဖိုလ် ကိုမရနိုင်တော့ပါဘူး။ အန္တရာယ်ငါးပါးက ဘာတွေလည်းဆိုတော့… 

၁။ ကမ္မန္တရာယ်.. ကံကြီးငါးပါးနဲ့ ဘိက္ခုနီဒူသကကံ၊

၂။ ကိလေသန္တရာယ်.. ကိလေသာဆယ်ပါးထဲမှာပါဝင်တဲ့ နတ္ထိကဒိဋ္ဌိ၊ အဟေတုကဒိဋ္ဌိ၊ အကိရိယဒိဋ္ဌိ ဆိုတဲ့ နိယတမိစ္ဆာဒိဋ္ဌိ တွေပါပဲ။ ဒီအယူကိုမစွန့်သမျှ နောက်ဘ၀မှာ အပါယ်တစ်လမ်းသာသွားဖို့ရှိတယ်။ ဥဘတောဗျည်းနဲ့ ပဏ္ဍုက်တွေကိုလည်း ဒီထဲပဲထည့်သွင်းထားရမယ်။ ၀ါဒစွန့်ရင်တော့ တရားထူးရနိုင်တယ်။

၃။ ၀ိပါကန္တရာယ်.. ဒွိဟိတ်နဲ့အဟိတ်ပုဂ္ဂိုလ်။

၎။ အရိယူပ၀ါဒန္တရာယ်.. အရိယာပုဂ္ဂိုလ်မှန်း သိသည်ဖြစ်စေ၊ မသိသည်ဖြစ်စေ ယုတ်မာတဲ့စိတ်ထားနဲ့ စွတ်စွဲ ကဲ့ရဲ့မိခဲ့မယ်ဆိုရင် ပြန်လည်မတောင်းပန်သမျှ တရားထူးမရနိုင်တော့ဘူး။

၅။ အာဏာဝီတိက္ကမန္တရာယ်.. လွန်ကျူးလိုတဲ့စေတနာနဲ့ ပညတ်ထားခဲ့တဲ့ သိက္ခာပုဒ်တွေကို မကုစားဘူးဆိုရင်လည်း ဒီဘ၀မှာ တရားထူးမရနိုင်တော့ပါဘူး။ ဆိုင်ရာ အာပတ်တွေကို ကုစားလို့ရတဲ့ နည်းလမ်းတွေကိုလည်း ဟေားထားတာရှိပါတယ်။ သင့်ရောက်တဲ့အပြစ်ကို ကုစားမယ်ဆိုရင်တော့ ဒီဘ၀မှာ တရားထူးတွေ ရနိုင်ပါတယ်။

       ဒီလောက်ဆိုရင် လူတိုင်းတရားထူးရနိုင်/မရနိုင် ဆိုတာ သိသင့်သလောက်တော့ သိသွားမယ်လို့ ယူဆပါတယ်။ ဒီထက်ပိုပြီး သိချင်လို့ လေ့လာမယ်ဆိုရင် သယ်ရတာလည်းလွယ်ကူ၊ စာအရေးအသားလည်း ကောင်း၊ အချိန်လည်း သိပ်ပေးစရာမလိုတဲ့ စာအုပ်လေးတစ်အုပ်ကို ပထမညွှန်လိုက်ပါရစေ..

မေတ္တာရှင် (ရွှေပြည်သာ) ရေးတဲ့ လူဖြစ်ရခြင်းရဲ့အဓိကရည်ရွယ်ချက် ဆိုတဲ့စာအုပ်လေးကိုလည်း ဖတ်ထားစေချင်ပါတယ်။